Civil service mein islahat ke liye smart reforms package tayyar, aham tarameem ki tajweez

Wafaqi wazir Ahsan Iqbal ki sarbarahi mein qaim committee ne civil service islahat ke liye Bharat samet 25 mumalik ke civil service nizamon ka jaiza lene ke baad hatmi sifarishat tayyar ki hain, sifarishat mein wafaqi civil mulazimeen ki bharti, tarbiyat, karkardagi janchne, tarraqi, taynati aur muraat ke mojuda tareeqa-e-kaar mein numayan tabdiliyan tajweez ki gayi hain.

Dastavez ke mutabiq islahat ke liye aain mein kisi tarmeem ki zaroorat nahin hogi.

Islahati package mein sifarish ki gayi hai ke afsaran ki tarraqi, taynati aur muraat ko mehaz seniority ke bajaye karkardagi aur qabiliyat se mashroot kiya jaye, afsaran ki karkardagi janchne ke liye policy sazi aur awam ko faraham kiye jane wale nataij ko bunyadi paimana banane ki tajweez di gayi hai.

Afsaran ki taynati ki muddat muqarrar karne aur muddat mukammal hone se qabl tabadle ki soorat mein wujuhat record par lane ki bhi sifarish ki gayi hai, grade 21 aur is se upar wafaqi aur soobai services ke darmiyan afsaran ki muntaqili ki ijazat dene ki tajweez bhi package ka hissa hai.

Sifarishat ke mutabiq CSS imtihan barqarar rahega jabke umeedwaron ke liye Urdu aur English zaban mein amli maharat ki shart bhi barqarar rakhne ki tajweez di gayi hai.

Imtihani nizam mein baaz aham tabdiliyon ki sifarish ki gayi hai, jin mein ibtidai test mein kamyabi ki had 33 feesad se barha kar 40 feesad karna aur manfi marking khatam karna shamil hai, imtihan mein umeedwaron ki tajziyati salahiyat janchne ke liye ek alag hissa shamil karne ki bhi sifarish ki gayi hai.

Mazmoon, precis and composition, Islamiat, Mutalia Pakistan aur current affairs ke parche Urdu mein karane ki tajweez di gayi hai.

Aik roza zabani imtihan ke bajaye ISB tarz par umeedwaron ki qabiliyat aur salahiyaton ka jame jaiza lene ki sifarish ki gayi hai, bharti ka mukammal amal chhe mah ya is se kam muddat mein mukammal karne ki tajweez bhi di gayi hai.

Kamyab umeedwar ko is ki taleemi qabiliyat se mutaliq makhsoos aasami par taynat karne ki sifarish ki gayi hai, jabke kam az kam grade 19 tak afsaran ki taynati mutaliqa wizaraton ke daira ikhtiyar tak mehdood rakhne ki tajweez hai.

Civil service afsaran ke national, senior aur mid career management courses mein dakhla musabiqati imtihan ke zariye karne ki sifarish ki gayi hai.

Islahat ke tehat National University of Public Administration qaim karne ki tajweez bhi di gayi hai, School of Public Policy, institutes of management aur deegar khusoosi tarbiyati idaron ko aik marboot nizam mein zam karne ki sifarish ki gayi hai.

Bharti aur tarbiyat ke amal mein ilaqai, lisani, sinfi aur tabqati bunyadon par musawat yaqeeni banane ki bhi sifarish ki gayi hai.

Mujawwaza islahat ke tehat har wizarat aur wazir-e-azam ke darmiyan salana karkardagi muahida karne aur saal mein do martaba is ka jaiza lene ki sifarish ki gayi hai.

Performance evaluation report ko afsaran ke nataij aur qabiliyat ki bunyad par murattab karke online karne ki tajweez di gayi hai.

Mulazimeen ke majmui akhrajat ka 5 feesad karkardagi ki bunyad par azazi raqoom ke liye mukhtas karne ki sifarish ki gayi hai, jabke karkardagi janchne ke liye teen sathi darja bandi ka nizam mutaarif karane ki tajweez bhi shamil hai.

Qaumi satah par karkardagi ki nigrani ke liye Civil Service Performance Review Board qaim karne aur sarkari idaron ke third party jaize ke liye Cabinet Division mein aik azad Performance Observatory qaim karne ki sifarish ki gayi hai.

Civil service islahat ke tehat grade 20 aur is se upar ke afsaran ke liye National Executive Service qaim karne ki tajweez di gayi hai, is service ke liye khusoosi pesha warana pay scale mutaarif karane ki sifarish ki gayi hai. Civil service mein 11 naye pesha warana groups qaim karne ki tajweez bhi samne aayi hai.

Islahat ke tehat Establishment Division ka naam aur kirdar tabdeel karke ise Human Resource Organization Development Division banane ki sifarish ki gayi hai.

Sifarishat mein civil mulazimeen ki tankhwahon mein salana bunyadon par Mehngai ke hisab se izafa karne ki tajweez di gayi hai, hukumat ki zamanat par civil mulazimeen ko gariyon ke qarze faraham karne aur wafaqi secretariat mein karkardagi se munsalik tankhwahon ka pilot program shuru karne ki sifarish ki gayi hai.

Retirement ke moqe par mulazimeen ko 50 lakh rupay ki yakmusht raqam par mushtamil package dene ki sifarish bhi ki gayi hai.

Dastavez mein islahat par amldaramad ke liye aik khusoosi committee qaim karne aur wazir-e-azam ko mahana bunyadon par pesh raft report pesh karne ki sifarish ki gayi hai.

Civil service islahat se mutaliq committee ki sifarishat ki hatmi manzoori wazir-e-azam se lene ki tajweez di gayi hai, islahati committee ke mutabiq mujawwaza package ka maqsad civil service mein bharti, tarbiyat, karkardagi, tarraqi, taynati aur muraat ke nizam ko ziyada qabiliyat, karkardagi aur nataij se munsalik karna hai.