Wazir-e-azam: Artificial Intelligence aur digitisation qaumi taraqqi ki kunji, Alibaba ke sath mansoobon ka jaiza

Islamabad: Wazir-e-azam Shehbaz Sharif ne Budh ko kaha ke qaumi taraqqi ka raaz Artificial Intelligence (AI) aur digitisation mein muzmir hai. Woh maeeshat aur governance mein AI o digitisation aur Alibaba Group ke sath taawun ki pesh raft par jaiza ijlas ki sadarat kar rahe the.

Wazir-e-azam office ke mutabiq unhon ne Zaraat, tijarat, Sehat aur governance sameet aham shobon mein in Technologies ko tezi se apnane par zor diya. Un ka kehna tha ke in ke moasir istemal se tijarat, baramadat, zarai paidawar, karobari sahulat aur sarkari khidmat ka miyar behtar hota hai.

Shehbaz Sharif ne bataya ke daura-e-China ke dauran Hangzhou mein Alibaba ke headquarter mein mufahimati yaddasht par dastkhat hue the. Un ke mutabiq Alibaba ke sath sharakat se chhote aur darmiyane karobaron ko alami mandiyon tak rasai dilana hukumat ki awwalin tarjihat mein shamil hai. Unhon ne zarai shobe mein automation aur Pakistani zarai ajnaas ki Chini mandiyon mein baramad ke liye Alibaba ke taawun ka khairmaqdam kiya.

Wazir-e-azam ne hidayat ki ke tamam mansoobe wazeh ahdaf, muddat aur moasir nigrani ke nizam ke sath mukammal kiye jayen. Mutalliqa wizaraton ko November tak tamam zaruri iqdamat mukammal kar ke pesh raft report jama karane ka hukm diya gaya.

Ijlas ko briefing di gayi ke Zaraat mein AI par mabni models, tambaku ki track and trace Technology aur malte o zaitoon ki baramad ke liye digital platform par kaam jari hai. Alibaba ki website par Pakistani masnooat ki baramad ke liye khusoosi Pakistan pavilion bhi qaim kiya ja chuka hai.

Wazir-e-azam office ke mutabiq Pakistan Single Window ke zariye tijarati dastawezat ki digital tasdeeq ka nizam faal ho chuka hai. Small and Medium Enterprises Development Authority aur Alibaba ke ishtirak se do sala program bhi shuru kiya ja raha hai, jis mein chhote karobaron ko alami mandiyon tak rasai, tarbiyat aur e-commerce ke mawaqe milen ge.

Ijlas mein FBR aur PRAL ke liye jadeed data platform aur central data Hub ki tayyari aur Sehat ke shobe mein AI ki madad se cancer ki tashkhees ke mojawwaza pilot mansoobe ka bhi jaiza liya gaya.