Sultan Tipu ki Wasiyat

Allama Muhammad Iqbal · Zarb-e-Kalim

Pas manzar

Yeh nazm Mysore ke hukmran Tipu Sultan se mansoob hai, magar yeh koi tarikhi wasiyat nama nahin: shayar ne Tipu ki zaban se naujawanon ko naseehat ki hai ke kisi manzil par ruk kar qanaat na karo. Yeh «Zarb-e-Kalim» (April 1936) ke hisse «Taleem o Tarbiyat» mein hai¹²³.

Kalam

Tu rah navard-e-shauq hai, manzil na kar qaboolLaila bhi ham nashin ho to mahmil na kar qabool

Ae joo-e-aab barh ke ho darya-e-tund o tezSahil tujhe ata ho to sahil na kar qabool

Khoya na ja sanam kada-e-kainat meinMehfil gudaz! Garmi-e-mehfil na kar qabool

Subh-e-azal yeh mujh se kaha Jibreel neJo aql ka ghulam ho, woh dil na kar qabool

Batil dui pasand hai, haq la sharik hai shirkat-e-miyana-e-haq o batil na kar qabool!

Mushkil alfaz

• Wasiyat: marte waqt ki naseehat ya hidayat
• Rah navard-e-shauq: shauq ke raste ka musafir
• Laila: Majnun ki mehbooba; yahan mehboob
• Ham nashin: sath baithne wala
• Mahmil: unt par rakha jane wala kajawa; yahan manzil aur aaram
• Joo-e-aab: nadi
• Darya-e-tund o tez: tez behne wala darya
• Sanam kada-e-kainat: duniya ka but khana
• Mehfil gudaz: mehfil ko pighla dene wala
• Subh-e-azal: kainat ki pehli subh
• Dui pasand: do rukha, do cheezon ko milane wala
• La sharik: jis ka koi sharik nahin
• Miyana-e-haq o batil: sach aur jhoot ke beech