Jawab-e-Shikwa

Allama Muhammad Iqbal · Bang-e-Dara, hissa som

Pas manzar

“Shikwa” ke baad Iqbal ne yeh nazm likhi, jis mein Allah ki taraf se jawab diya gaya hai: zawal ka sabab khud musalmanon ki be-amli hai, aur jo ishq aur amal ka rasta apnaye uske liye aaj bhi wohi wade hain. Yeh chhe chhe misron ke 36 bandon ki nazm hai aur “Bang-e-Dara” ke teesre hisse mein hai¹². Ek riwayat ke mutabiq Iqbal ne isse 1913 mein Lahore ke Mochi Darwaze ke bahar ek jalse mein sunaya³; International Iqbal Society ki fehrist mein iska saal 1912 hai⁴.

Kalam

Dil se jo baat nikalti hai asar rakhti haiPar nahin taqat-e-parwaz magar rakhti hai

Qudsi-ul-asl hai rifat pe nazar rakhti haiKhak se uthti hai gardoon pe guzar rakhti hai

Ishq tha fitna gar o sarkash o chalak meraAasman cheer gaya nala-e-bebaak mera

*

Peer-e-gardoon ne kaha sun ke kahin hai koiBole sayyare sar-e-arsh-e-barin hai koi

Chand kehta tha nahin ahl-e-zameen hai koiKehkashan kehti thi poshida yahin hai koi

Kuch jo samjha mere shikwe ko to Rizwan samjhaMujh ko jannat se nikala hua insan samjha

*

Thi farishton ko bhi hairat ke yeh awaz hai kyaArsh walon pe bhi khulta nahin yeh raaz hai kya

Ta sar-e-arsh bhi insan ki tag-o-taz hai kyaAa gayi khak ki chutki ko bhi parwaz hai kya

Ghafil aadab se sukkan-e-zameen kaise hainShokh o gustakh yeh pasti ke makeen kaise hain

*

Is qadar shokh ke Allah se bhi barham haiTha jo masjood-e-malaik yeh wohi Adam hai

Alam-e-kaif hai dana-e-rumuz kam haiHaan magar ajz ke asrar se na-mehram hai

Naz hai taqat-e-guftar pe insanon koBaat karne ka saliqa nahin nadanon ko

*

Aayi awaz gham-angez hai afsana teraAshk-e-betab se labrez hai paimana tera

Aasman-geer hua nara-e-mastana teraKis qadar shokh zaban hai dil-e-deewana tera

Shukr shikwe ko kiya husn-e-ada se tu neHam-sukhan kar diya bandon ko Khuda se tu ne

*

Ham to mail ba karam hain koi sail hi nahinRaah dikhlayen kise rahrau-e-manzil hi nahin

Tarbiyat aam to hai jauhar-e-qabil hi nahinJis se tameer ho Adam ki yeh woh gil hi nahin

Koi qabil ho to ham shan kai dete hainDhoondne walon ko duniya bhi nai dete hain

*

Haath be-zor hain ilhad se dil khugar hainUmmati baais-e-ruswai-e-paighambar hain

But-shikan uth gaye baqi jo rahe but-gar hainTha Ibrahim pidar aur pisar Azar hain

Bada-ashaam naye bada naya khum bhi nayeHaram Kaaba naya but bhi naye tum bhi naye

*

Woh bhi din the ke yehi maya-e-raanai thaNaazish-e-Mausam-e-gul lala-e-sehrai tha

Jo musalman tha Allah ka saudai thaKabhi mehboob tumhara yehi harjai tha

Kisi yakjai se ab ahd-e-ghulami kar loMillat-e-Ahmad-e-Mursal ko maqami kar lo

*

Kis qadar tum pe giran subah ki bedari haiHam se kab pyar hai haan neend tumhein pyari hai

Taba azad pe qaid-e-Ramzan bhari haiTumhein kah do yehi aaeen-e-wafadari hai

Qaum mazhab se hai mazhab jo nahin tum bhi nahinJazb-e-baham jo nahin mehfil-e-anjum bhi nahin

*

Jin ko aata nahin duniya mein koi fan tum hoNahin jis qaum ko parwa-e-nasheman tum ho

Bijliyan jis mein hon aasuda woh kharman tum hoBaich khate hain jo aslaf ke madfan tum ho

Ho nikoo naam jo qabron ki tijarat kar keKya na bechoge jo mil jayen sanam pathar ke

*

Safha-e-dahr se batil ko mitaya kis neNau-e-insan ko ghulami se chhudaya kis ne

Mere Kaabe ko jabeenon se basaya kis neMere Quran ko seenon se lagaya kis ne

The to aaba woh tumhare hi magar tum kya hoHaath par haath dhare muntazir-e-farda ho

*

Kya kaha bahr-e-musalman hai faqat wada-e-hoorShikwa be-ja bhi kare koi to lazim hai shaoor

Adl hai fatir-e-hasti ka azal se dastoorMuslim aaeen hua kafir to mile hoor o qusoor

Tum mein hooron ka koi chahne wala hi nahinJalwa-e-Toor to maujood hai Moosa hi nahin

*

Manfaat ek hai is qaum ki, nuqsan bhi ekEk hi sab ka nabi deen bhi imaan bhi ek

Haram-e-pak bhi Allah bhi Quran bhi ekKuch badi baat thi hote jo musalman bhi ek

Firqa bandi hai kahin aur kahin zaatein hainKya zamane mein panapne ki yehi baatein hain

*

Kaun hai tarik-e-aaeen-e-Rasool-e-MukhtarMaslehat waqt ki hai kis ke amal ka miyar

Kis ki aankhon mein samaya hai shiar-e-aghyarHo gayi kis ki nigah tarz-e-salaf se bezar

Qalb mein soz nahin rooh mein ehsas nahinKuch bhi paigham-e-Muhammad ka tumhein paas nahin

*

Ja ke hote hain masajid mein saf-ara to ghareebZehmat-e-roza jo karte hain gawara to ghareeb

Naam leta hai agar koi hamara to ghareebParda rakhta hai agar koi tumhara to ghareeb

Umara nasha-e-daulat mein hain ghafil ham seZinda hai millat-e-baiza ghurba ke dam se

*

Waiz-e-qaum ki woh pukhta khayali na rahiBarq-tabai na rahi shola-maqali na rahi

Reh gayi rasm-e-azan rooh-e-Bilali na rahiFalsafa reh gaya talqeen-e-Ghazali na rahi

Masjiden marsiya-khwan hain ke namazi na raheYani woh sahib-e-ausaf-e-Hijazi na rahe

*

Shor hai ho gaye duniya se musalman naboodHam yeh kehte hain ke the bhi kahin muslim maujood

Waza mein tum ho nasara to tamaddun mein hunoodYeh musalman hain jinhein dekh ke sharmayen yahood

Yun to Syed bhi ho Mirza bhi ho Afghan bhi hoTum sabhi kuch ho batao to musalman bhi ho

*

Dam-e-taqreer thi Muslim ki sadaqat bebaakAdl uska tha qawi lauth-e-muraat se paak

Shajar-e-fitrat-e-Muslim tha haya se namnakTha shujaat mein woh ik hasti fauq-ul-idrak

Khud gudazi nam-e-kaifiyat-e-sahbaish boodKhali az khwesh shudan surat-e-minaish bood

*

Har musalman rag-e-batil ke liye nishtar thaUs ke aaina-e-hasti mein amal jauhar tha

Jo bharosa tha use quwwat-e-bazu par thaHai tumhein maut ka dar us ko Khuda ka dar tha

Baap ka ilm na bete ko agar azbar hoPhir pisar qabil-e-meeras-e-pidar kyunkar ho

*

Har koi mast-e-mai-e-zauq-e-tan-asani haiTum musalman ho yeh andaz-e-musalmani hai

Haidari faqr hai ne daulat-e-Usmani haiTum ko aslaf se kya nisbat-e-roohani hai

Woh zamane mein moazziz the musalman ho karAur tum khwar hue tarik-e-Quran ho kar

*

Tum ho aapas mein ghazabnak woh aapas mein raheemTum khata-kar o khata-been woh khata-posh o kareem

Chahte sab hain ke hon auj-e-Surayya pe muqeemPehle waisa koi paida to kare qalb-e-saleem

Takht-e-Faghfoor bhi un ka tha sareer-e-Kai bhiYunhi baatein hain ke tum mein woh hamiyat hai bhi

*

Khudkushi sheva tumhara woh ghayoor o khuddarTum akhuwat se gurezan woh akhuwat pe nisar

Tum ho guftar sarapa woh sarapa kirdarTum taraste ho kali ko woh gulistan ba-kinar

Ab talak yaad hai qaumon ko hikayat un kiNaqsh hai safha-e-hasti pe sadaqat un ki

*

Misl-e-anjum ufaq-e-qaum pe roshan bhi hueBut-e-Hindi ki mohabbat mein Brahman bhi hue

Shauq-e-parwaz mein mahjoor-e-nasheman bhi hueBe-amal the hi jawan deen se badzan bhi hue

Un ko tehzeeb ne har band se azad kiyaLa ke Kaabe se sanam-khane mein abad kiya

*

Qais zehmat-kash-e-tanhai-e-sehra na raheShehr ki khaye hawa badiya-paima na rahe

Woh to deewana hai basti mein rahe ya na raheYeh zaroori hai hijab-e-rukh-e-Laila na rahe

Gila-e-jaur na ho shikwa-e-bedad na hoIshq azad hai kyun husn bhi azad na ho

*

Ahd-e-nau barq hai aatish-zan-e-har kharman haiAimin is se koi sehra na koi gulshan hai

Is nai aag ka aqwam-e-kuhan endhan haiMillat-e-khatm-e-rusul shola ba pairahan hai

Aaj bhi ho jo Ibrahim ka imaan paidaAag kar sakti hai andaz-e-gulistan paida

*

Dekh kar rang-e-Chaman ho na pareshan maliKaukab-e-ghuncha se shakhein hain chamakne wali

Khas o khashak se hota hai gulistan khaliGul bar-andaz hai khoon-e-shuhada ki lali

Rang-e-gardoon ka zara dekh to unnabi haiYeh nikalte hue sooraj ki ufaq-tabi hai

*

Ummatein gulshan-e-hasti mein samar-chida bhi hainAur mehroom-e-samar bhi hain khizan-dida bhi hain

Saikdon nakhl hain kahida bhi balida bhi hainSaikdon batn-e-Chaman mein abhi poshida bhi hain

Nakhl-e-Islam namoona hai barumandi kaPhal hai yeh saikdon sadiyon ki Chaman-bandi ka

*

Pak hai gard-e-watan se sar-e-daman teraTu woh Yusuf hai ke har Misr hai Kanaan tera

Qafila ho na sakega kabhi veeran teraGhair yak bang-e-dara kuch nahin saman tera

Nakhl-e-shama asti o dar shola dawad reshaa-e-tuAaqibat soz bood saya-e-andesha-e-tu

*

Tu na mit jayega Iran ke mit jane seNasha-e-mai ko taalluq nahin paimane se

Hai ayan yurish-e-Tatar ke afsane sePasban mil gaye Kaabe ko sanam-khane se

Kashti-e-haq ka zamane mein sahara tu haiAsr-e-nau raat hai dhundla sa sitara tu hai

*

Hai jo hangama bapa yurish-e-Bulghari kaGhafilon ke liye paigham hai bedari ka

Tu samajhta hai yeh saman hai dil-azari kaImtihan hai tere isar ka khuddari ka

Kyun harasan hai sahil-e-faras-e-aada seNoor-e-haq bujh na sakega nafas-e-aada se

*

Chashm-e-aqwam se makhfi hai haqiqat teriHai abhi mehfil-e-hasti ko zaroorat teri

Zinda rakhti hai zamane ko hararat teriKaukab-e-qismat-e-imkan hai khilafat teri

Waqt-e-fursat hai kahan kaam abhi baqi haiNoor-e-tauheed ka itmam abhi baqi hai

*

Misl-e-boo qaid hai ghunche mein pareshan ho jaRakht bar dosh hawa-e-Chamanistan ho ja

Hai tunak maya to zarre se bayaban ho jaNaghma-e-mauj se hangama-e-toofan ho ja

Quwwat-e-ishq se har past ko baala kar deDahr mein ism-e-Muhammad se ujala kar de

*

Ho na yeh phool to bulbul ka tarannum bhi na hoChaman-e-dahr mein kaliyon ka tabassum bhi na ho

Yeh na saqi ho to phir mai bhi na ho khum bhi na hoBazm-e-tauheed bhi duniya mein na ho tum bhi na ho

Khema-e-aflak ka istada isi naam se haiNabz-e-hasti tapish-amada isi naam se hai

*

Dasht mein daman-e-kohsar mein maidan mein haiBahr mein mauj ki aaghosh mein toofan mein hai

China ke shehr Marakish ke bayaban mein haiAur poshida musalman ke imaan mein hai

Chashm-e-aqwam yeh nazara abad tak dekheRifat-e-shan-e-rafana laka zikrak dekhe

*

Mardum-e-chashm-e-zameen yani woh kali duniyaWoh tumhare shuhada palne wali duniya

Garmi-e-mehr ki parwarda hilali duniyaIshq wale jise kehte hain Bilali duniya

Tapish-andoz hai is naam se pare ki tarahGhota-zan noor mein hai aankh ke tare ki tarah

*

Aql hai teri sipar ishq hai shamsheer teriMere darvesh khilafat hai jahangeer teri

Ma-siwa Allah ke liye aag hai takbeer teriTu musalman ho to taqdeer hai tadbeer teri

Ki Muhammad se wafa tu ne to ham tere hainYeh jahan cheez hai kya lauh o qalam tere hain

Mushkil alfaz

• Asar rakhti hai: dil par asar karti hai
• Par nahin taqat-e-parwaz: udne ki taqat na hona
• Rifat: bulandi
• Gardoon: aasman
• Peer-e-gardoon: boorha aasman
• Rizwan: jannat ka daroga
• Kehkashan: aasman par sitaron ki lambi patti
• Qudsi: farishte
• Shokh: gustakh, bebaak
• Harjai: bewafa, har jagah dil lagane wala
• Yakjai: ek hi jagah ka ho rehna
• Maqami: ek jagah tak mehdood
• Manfaat: faida
• Haram: khana-e-Kaaba
• Aaba: baap dada, buzurg
• Sareer: takht
• Ghayoor: gairat mand
• Akhuwat: bhai chara
• Dood: dhuan (farsi sher mein “dawad”: dorti hai)
• Aaqibat soz: anjam ko jala dene wala
• Tunak maya: kam sarmaya, kamzor
• Hangama-e-toofan: toofan ka shor
• Rafana laka zikrak: “Ham ne aap ka zikr buland kiya” (Surah Alam Nashrah ki ayat)
• Mardum-e-chashm: aankh ki putli
• Aql hai teri sipar: aql teri dhal hai
• Darvesh: faqeer
• Masiwa: siwa, Allah ke alawa sab kuch
• Lauh o qalam: taqdeer ki takhti aur qalam